![GSH APP](https://gazetashqiptare.al/wp-content/uploads/2022/04/gshok.jpg)
![Download on Apple Store](https://balkanweb.com/wp-content/uploads/2019/01/ios.jpg)
![Get it on Google Play](https://gazetashqiptare.al/wp-content/uploads/2022/04/android-app.png)
Kryeministri Edi Rama vazhdon t’i qëndrojë mendimit të tij se nuk kemi të bëjmë me aferë të inceneratorëve, duke u shprehur se është bërë një punë e mirë për të shpëtuar tre komunitet nga makthi i plehrave.
Në një replike me një qytetar në Facebook, kreu i qeverisë shprehet se nëse në këtë punë të mirë ka pasur edhe individë që mbrapa shpinës se qeverise, kane abuzuar me pushtetin e tyre, për te nxjerre përfitime te paligjshme, kete e nxjerr hetimi dhe gjykimi i drejtësisë, jo propaganda politike.
Qytetari: A ndjeni përgjegjësi Ju Z. Kryeministër për aferën e inceneratorve?
Edi Rama: Për cilën “aferë të inceneratoreve” se unë nuk di ndonjë aferë inceneratoresh, por di një punë të mirë që ka shpëtuar tre komunitete të mëdha nga makthi i plehrave, në Tirane, Elbasan dhe Fier! Nëse në këtë punë të mirë ka pasur edhe individë qe mbrapa shpinës së qeverise, kane abuzuar me pushtetin e tyre, për te nxjerre përfitime te paligjshme, këtë e nxjerr hetimi dhe gjykimi i drejtësisë, jo propaganda politike apo balta mediatike! Por kjo nuk e ndryshon faktin se veprat janë ndërtuar, janë aty dhe janë në shërbim të komuniteteve, te shëndetit publik e te mjedisit.
Edhe një ditë më parë, kryeministri Edi Rama në një intervistë për Zërin e Amerikës u shpreh se nuk është i shqetësuar nëse në këtë aferë janë përfshirë ministra apo ish-ministra, sepse kjo po hetohet nga SPAK.
“Unë nuk jam i shqetësuar absolutisht se mund të dalin ministra apo ish ministra apo kushdo qoftë tjetër, sepse për këtë e kemi bërë reformën në drejtësi. Unë e kam thënë se reforma në drejtësi bëhet për një drejtësi të drejtë, as të majtë as të djathtë. Nga ana tjetër përgjegjësia për rolin e çfarëdo qoftë në jetën publike është një përgjegjësi individuale. Këtë e kam besuar atëherë e besoj edhe sot. Nëse ka njerëz që “kanë ngjyer gishtin apo dorën” në një proces, i cili është bërë për t’i shërbyer vendit, për t’i shërbyer komuniteteve, për një Shqipëri më të pastër dhe për komunitete më të shëndetshme sigurisht që ata duhet të marrin ndëshkimin e merituar, sepse e kanë bërë këtë pas shpinës së një force qeverisëse që është këtu për shqiptarët dhe nuk është këtu për xhepat e vet”